Beit húsmóður í tvo fingur

Á fimmta tímanum í nótt var karlmaður á fertugsaldri handtekinn í heimahúsi á Álftanesi. Maðurinn, sem ekki átti heima í húsinu beit húsmóðurina í tvo fingur og heimilisfaðirinn fékk einnig áverka. Þau voru bæði flutt á slysadeild með sjúkrabifreið. Ekki liggur fyrir hve alvarleg meiðslin eru. Maðurinn, sem var í annarlegu ástandi, var vistaður í fangaklefa.

Fimm ökumenn voru teknir úr umferð í nótt fyrir akstur bifreiða undir áhrifum áfengis og fíkniefna. Fjórir voru ölvaðir og einn í annarlegu ástandi.

Á fjórða tímanum í nótt var þrítugur karlmaður með áverka á höfði fluttur á slysadeild, með sjúkrabifreið. Sá hafði orðið fyrir líkamsárás á skemmtistað við Austurvöll. Vitað er hver árásarmaðurinn er. Hann var farinn af vettvangi þegar lögregla kom á staðinn og hefur ekki enn verið handtekinn.