Píratar auglýsa eftir framkvæmdastjóra

Stjórnmálahreyfingin Píratar auglýsir nú á síðu sinni eftir framkvæmdastjóra í 50% starf. Samkvæmt auglýsingunni mun starfið meðal annars fela í sér ábyrgð á rekstri og starfsemi hreyfingarinnar og að „standa skil á skyldum Pírata samkvæmt landslögum“. 

Umsækjendur þurfa að búa yfir frumkvæði, lipurð í samskiptum og sjálfstæðum vinnubrögðum. Fyrsta skilyrði er þó einfaldlega að viðkomandi sé Pírati. Umsóknir þurfa að berast fyrir 29. nóvember næstkomandi og nýr framkvæmdastjóri tæki við störfum 1. janúar. 

Píratarnir náðu þremur mönnum á þing í síðustu kosningum, þeim Birgittu Jónsdóttur, Helga Hrafni Gunnarssyni og Jóni Þór Ólafssyni. Eva Lind Þuríðardóttir er enn sögð framkvæmdastjóri flokksins á síðu þeirra.