Formaður SA vill þjóðarsátt um aukningu kaupmáttar

Framkvæmdastjóri Samtaka atvinnulífsins segir það ekki innlegg í málefnalega umræðu að líkja forystu samtakanna við Hitler og liðsmenn hans í birginu undir kanslarahöllinni dagana fyrir lok seinni heimsstyrjaldarinnar. Samtökin vilji þjóðarsátt um að auka kaupmátt í landinu.

Í yfirstandandi kjaraviðræðum er tekist á um það hvernig auka megi kaupmáttinn í landinu og hvað hægt er að auka hann mikið. En auglýsing frá Samtökum atvinnulífsins hefur hleypt illu blóði í marga í verkalýðshreyfingunni. Þar er talað um að launahækkanir á undanförnum árum hafi leitt til verðlagshækkana og skynsamara sé að fara leið lítilla launahækkana til að auka og verja kaupmáttinn.

Vilhjálmur Birgisson formaður Verkalýðsfélags Akraness brást sérstaklega illa við þessari auglýsingu og klippti nýjan texta við atriði úr kvikmyndinni Der Untergang með Hitler í birginu undir lok seinni heimsstyrjaldarinnar, algerlega úr sambandi við  umheiminn og heimfærir upp á stjórnendur samtaka atvinnulífsins

Má ekki segja að Samtök atvinnulífsins hafi boðið upp í þennan dans með sinni auglýsingu?

„Nei, ég myndi ekki segja það. Við erum að birta auglýsingu sem byggir á tölulegum staðreyndum um launaþróun hér og í samanburði við Norðurlönd. Svo aftur sviðsmynd sem Seðlabankinn hefur dregið upp varðandi hvernig hlutirnir gætu verið öðruvísi,“ segir Þorsteinn Víglundsson framkvæmdastjóri Samtaka atvinnulífsins.

Miklar nafnlaunahækkanir hafi ekki skilað sömu kaupmáttaraukningu og samningar hafi gert á Norðurlöndum. Launaþróun hafi leitt miklar verðlagsbreytingar allt frá þjóðarsátt fyrir um 20 árum og hækkað um 50 prósent umfram ráðleggingar Seðlabankans. Þorsteinn segir Samtök atvinnulífsins í raun boða nýja þjóðarsátt til að auka kaupmátt í ákveðnum skrefum.

„Við erum að leita hér að lausn á vanda sem við erum búin að vera að glíma við í raun og veru um áratugaskeið, með einni undantekningu á tímum síðustu þjóðarsáttar. Og við erum að reyna að finna varanlega lausn á því. Við erum alltaf til í málefnalega umræðu. En þetta var ekki málefnalegt innlegg í þá umræðu,“ segir Þorsteinn.

Ósmekklegt að líkja stjórn SA við Hitler og hans félaga niður í kjallara?

„Við getum orðað það þannig að það er ekki góður félagsskapur að vera í,“ svarar Þorsteinn.