„Herbergisfélagi minn er á leiðinni í skólann til að skjóta fólk“

Nemendur Yale-háskóla í Bandaríkjunum hafa verið hvattir til að leita skjóls í kjölfar tilkynningar um að vopnaður maður gangi laus á háskólasvæðinu. Nemendurnir fengu textaskilaboð frá stjórn skólans þar sem staðfest var að byssumaður væri á svæðinu og að ekki væri um æfingu að ræða.

Sérsveit lögreglunnar er á svæðinu að sögn háskólablaðsins Yale Daily News, og hefur götum í nágrenni háskólasvæðisins verið lokað. „Herbergisfélagi minn er á leiðinni í skólann til að skjóta fólk,“ sagði einstaklingur sem hafði samband við lögreglu en gaf ekki upp nafn. Símtalið kom úr símaklefa og skoðar alríkislögreglan nú upptökur öryggismyndavéla nálægt klefanum.

Að sögn lögreglu hefur sést til mannsins á svæðinu en skotum ekki verið hleypt af. Fáir nemendur eru á háskólasvæðinu vegna Þakkargjörðarhátíðarinnar sem gengur í garð á fimmtudag.