Landsbankinn opnar nýja kynslóð útibúa

Landsbankinn opnaði í dag nýja kynslóð bankaútibúa og það fyrsta sinnar tegundar á Íslandi. Við Hagatorg er fyrsta bankaútibú landsins án gjaldkera.

Útibú Landsbankans við Hagatorg í Reykjavík var opnað í dag eftir gagngerar breytingar. Áhersla verður lögð á ráðgjöf og persónulega þjónustu. Það sem helst vekur athygli er að engir gjaldkerar munu starfa í útibúinu en þess í stað geta viðskiptavinir notast við hraðbanka til að ná sér í lausafjámuni.

Brynjólfur Ægir Sævarsson, útibústjóri Landsbankans í Vesturbæ, er ánægður með breytingarnar. Engin fækkun verður á starfsfólki og kalli viðskiptavina eftir betri þjónustu og ráðgjöf er svarað.

„Við stígum fram fyrir afgreiðsluborðið og eigum fyrir vikið meiri tíma fyrir samtal við viðskiptavini,“ segir Brynjólfur.

Bankaviðskipti Íslendinga fara í dag aðallega fram með rafrænum hætti. Með auðveldum hætti er hægt að sinna helstu bankaviðskiptum í gegnum netið eða með snjallsímum. Er tæknin að leysa bankastarfsmanninn af hólmi?

„Nei, bara létta undir eins og annars staðar svo við höfum meiri tíma fyrir mannleg samskipti. Þetta er þróunarverkefni hjá okkur og við ætlum að læra af þessu, nýta það sem að viðskiptavinurinn hefur að segja og nýta það til að veita ennþá betri þjónustu,“ segir Brynjólfur Ægir.

„Heimsóknum til gjaldkera hefur fækkað og hér getum við leiðbeint fólki ennþá betur með tæknilausnum. Þeir sem vilja læra og bjarga sér sjálfir - þeim getum við leiðbeint í gegnum tæknifrumskóginn.“