20 ár frá einum mikilvægasta mánuði rappsögunnar

Nú eru liðin 20 ár frá gríðarlega mikilvægum mánuði í sögu rapptónlistar. Í nóvember árið 1993 komu út þrjár plötur sem hægt er að kalla klassískar. 

Midnight Marauders

9. nóvember 1993 gaf sveitin A Tribe Called Quest út plötuna Midnight Marauders, sem var þriðja breiðskífa sveitarinnar. Platan innihélt lagið Award Tour sem var söluhæsta smáskífa sem sveitin gaf út. Hægt er að sjá myndbandið við lagið hér fyrir neðan en í því kemur einnig fram rapparinn Trugoy úr vinasveit Tribe, De La Soul.

Platan er yfirleitt flokkuð undir jazzskotna rapptónlist og er talin vera ein mikilvægasta plata rappsögunnar í þeim flokki. Textarnir fjalla um daglegt líf í fátækrahverfum bandarískra stórborga. Sveitin fjallaði lítið um ofbeldi, sem var vinsælt umfjöllunarefni rappara á þessum tíma, meira var lagt upp úr hversdagslegum hlutum auk þess sem fjallað var um kynþáttahatur og samskipti kynjanna. 

Platan náði platínusölu og var á lista bandaríska hip-hop tímaritsins The Source yfir 100 bestu plötur rappsögunnar.

36 Chambers

Sama dag kom platan 36 Chambers með Wu-Tang Clan út. Þrátt fyrir að tónlist Wu-Tang Clan væri lítt söluvæn náði platan fínum árangri á Billboard listanum í Bandaríkjunum og náði 41. sæti listans þegar best gekk. Velgengni plötunnar mátti betur merkja í áhrifum hennar innan hip-hop senunnar í Bandaríkjunum. 

Tímaritið Rolling Stone setti plötuna á lista yfir 500 bestu plötur sögunnar og eina af mikilvægustu breiðskífum 10. áratugarins. The Source gaf plötunni hæstu einkunn og sama má segja um hip-hop tímaritið XXL. MTV tónlistarstöðin hlóð lofi á plötuna, valdi hana eina af 100 bestu rappplötum allra tíma og valdi þrjú lög af plötunni á lista yfir 100 bestu rapplög allra tíma.

Platan er oft talin hafa markað endurreisn rapptónlistar frá Austurströnd Bandaríkjanna, en sveitin kemur frá New York borg. Lög eins og C.R.E.A.M., Protect ya Neck og M.E.T.H.O.D. Man eru sígild rapplög. Skemmtileg samsetning rapptónlistar og hljóðbúta úr gömlum asískum kung fu bardagakvikmyndum vakti mikla athygli. Sveitin náði miklum vinsældum hér á landi á síðari hluta 10. áratugarins og mátti gjarnan sjá auðþekkjanlegt merki sveitarinnar á strætóskýlum og í undirgöngum.

Hér fyrir neðan er eitt fyrsta myndbandið sem sveitin sendi frá sér haustið 1993 við lagið Da Mystery Of Chessboxin'. Það vakti strax gríðarlega athygli fyrir fersk efnistök sveitarinnar.

Doggystyle

Þann 23. nóvember kom platan Doggystyle með rapparanum Snoop Doggy Dogg út. Þetta var frumraun rapparans, sem er enn að undir nafninu Snoop Lion, eftir að hafa kallað sig Snoop Dogg í fjölda ára. Snoop vakti mikla athygli fyrir frammistöðu sína á plötu Dr. Dre sem bar titilinn The Chronic og kom út ári áður. Rappunnendur voru spenntir að heyra Snoop á sinni eigin plötu. 

Platan náði gífurlegum vinsældum, seldist í fimm milljónum eintaka í Bandaríkjunum, sem er fjórföld platínusala. Platan náði fyrsta sæti Billboard listans, var vinsælasta plata Bandaríkjanna. Platan fékk gífurlegt lof gagnrýnenda og þykir vera einhver albesta frumraun rappara í sögu hip-hop tónlistar. 

Lagið Who Am I (What‘s my Name)? náði gífurlegum vinsældum. Fleiri vinsæl lög má finna á plötunni. Serial Killa, Gin and Juice, G‘z and Hustlas og Lodi Dodi þykja öll sígild nú á dögum. Hún var á listum The Source, Rolling Stone og flestra helstu tónlistartímarita yfir mikilvægustu plötur 10. áratugarins.