40 prósent háskólanema á lausu

Rétt um 40 prósent háskólanema við Háksóla Íslands eru á lausu en 60 prósent nemanna eru í föstu sambandi. Því yngri sem nemendurnir eru því líklegra er að þeir séu einhleypir.

Þessar tölur fengust eftir óformlega könnun sem gerð var á Facebook á vegum student.is. Í frétt á student.is kemur fram að úrtakið í könnuninni endurspegli ekki mikinn fjölda háskólanema.

Aðeins 33 prósent eldri nemenda eru einhleypir á meðan 43 prósent yngri nema eru á lausu. Á student.is kemur fram að hinn týpíski háskólanemi sé 27 ára gamall, í föstu sambandi og með fimm ára langtímasamband að baki.

Gyða Margrét Pétursdóttir, lektor í kynjafræði, segir niðurstöðuna þó ekki endilega vera fjarri lagi þrátt fyrir lítið úrtak. Hún segir að samkvæmt upplýsingum frá Hagstofu Íslands virðist meðalaldur við stofnun sambúðar fara hækkandi hér á landi, bæði hjá körlum og konum.

Hún segir það verðugt rannsóknarefni að komast að því hvað valdi því að fólk stofni síður til fastra sambanda nú en áður og fari síðar í sambúð. Hún nefnir í því tilliti að ein ástæðan gæti verið sú að ungt fólk búi lengur í foreldrahúsum þar sem fasteigna- og leiguverð sé hátt í dag.