"Mamma hættir að reykja um áramótin“

Stúlka sem vill að mamma sín hætti að reykja tók málin í sínar hendur og um áramótin verður henni að ósk sinni. .

Hin 12 ára gamla Vala Margrét Hjálmtýsdóttir birti mynd á Facebook síðu sinni í gær en á myndinni heldur hún sjálf á skilti þar sem stendur: „Ef ég fæ 1000 like þá hættir mamma mín að reykja“. Viðbrögðin stóðu ekki á sér, miklu fleiri en 1000 manns hafa smellt like á myndina og það þýðir bara eitt. „Hún hættir að reykja um áramótin“, segir Vala. Af hverju áramótin urðu fyrir valinu segir hún að það sé svo mamma hennar, Sigþrúður Þorfinnsdóttir, geti reykt yfir jólin og áramótin.

Sigþrúður reykir pakka á dag en hún byrjaði að reykja fyrir þrjátíu árum og segir sígarettuna vera harðan húsbónda. „Maður stjórnast alveg af þessu, fíkninni“. Sigþrúður hefur nokkrum sinnum reynt að hætta en með litlum árangri. „Það hefur alltaf staðið mjög stutt, en núna á að kýla á þetta og gera þetta. Tími til kominn“, segir hún.

Þær mæðgur eru meðvitaðar um að reykingalykt er engin ilmvatnslykt og að hún finnst ekki bara af reykingamanninum sjálfum, heldur líka af þeim sem nálægt eru á meðan reykt er og inni á heimilinu, en Sigþrúður reykir einungis í eldhúsinu.

Vala ætlar aldrei að byrja að reykja og ástæðan er einföld. „Ég vil ekki fá krabbamein“, segir þessi 12 ára gamla stúlka sem lætur verkin tala.