Fyllti á símakort fyrir hálfa milljón án þess að borga

21 árs gamall karlmaður var dæmdur í tveggja mánaða skilorðsbundið fangelsi í Héraðsdómi Reykjaness í dag fyrir fjársvik. Maðurinn nýtti sér kerfisvillu hjá Íslandsbanka til þess að fylla á fyrirframgreidd símakort án þess að viðkomandi bankareikningur væri skuldfærður.

Fyllti maðurinn 100 sinnum á 59 mismunandi símakort fyrir samtals 496 þúsund krónur á tímabilinu 28. desember 2009 til 15. janúar 2010.  Háttsemi ákærða kom ekki í ljós fyrr en að Íslandsbanki var krafinn greiðslu vegna áfyllinganna af hálfu símafélaganna sem og hann greiddi með tilheyrandi tjóni fyrir bankann.

Maðurinn játaði brotið og samþykkti að greiða bankanum vegna áfyllinganna, auk dráttarvaxta, en hann var einnig dæmdur til þess að greiða allan sakarkostnað.