"Á meðan kerfið er svona losnar hún ekki undan þessu“

Faðir fjörtíu og fjögurra ára konu sem hefur verið háð læknadópi í tvö ár segir lyfseðlakerfið á Íslandi meingallað og ekkert eftirlit haft með lyfjaskömmtum sjúklinga.

Dóttir mannsins ánetjaðist lyfseðilsskyldum lyfjum eftir að hún fór í aðgerð árið 2011, en í kjölfar aðgerðarinnar var hún sett á verkjalyf, svefnlyf og þunglyndislyf. Faðirinn segir hana hafa verið setta á of sterk lyf frá byrjun.

Hálfu ári eftir aðgerðina leitaði konan læknisaðstoðar vegna magaverkja. Þá var henni tjáð að verkirnir stöfuðu af ofnotkun lyfja sem væru að lama líffæri hennar. „Þarna var hún bara orðin fíkill,“ segir faðirinn. 

Læknar senda lyfseðla í flestum tilfellum rafrænt í lyfjagátt apótekanna. Sá galli er á kerfinu að í flestum tilfellum geta læknar ekki séð hvaða lyfseðlar hafa þegar verið gefnir út á viðkomandi sjúkling. Faðirinn segir dóttur sína ganga á milli lækna og fá þá til að skrifa upp á lyf fyrir sig. „Hún fer bara á mismunandi staði og fær það sem hún vill. Þegar fólk er komið á þennan stað lýgur það bara," segir hann.

Embætti landlæknis og Lyfjastofnun vinna nú að því að veita öllum læknum aðgang að Lyfseðlagáttinni með rafrænum skilríkjum.  Samkvæmt heimildum fréttastofu hafa nú um 340 læknar fengið slík skilríki. Skilríkin veita læknunum þó ekki aðgang að símsendum lyfjaávísunum og pappírslyfseðlum, sem eru enn í töluverðri notkun.