Enn varað við stormi - innanlandsflug úr skorðum

Almannavarnir, Vegagerðin og Veðurstofan vara fólk við að búist sé við stormi, eða jafnvel roki á mest öllu landinu í dag með éljahryðjum og lélegu skyggni og vestan vindi allt upp í 25 metra á sekúndu.

Þegar líður á daginn fer heldur að hægja, fyrst norðvestan til og hiti verður eitt til sjö stig.

Þó er spáð stormi á öllum miðum og djúpum og fárviðri á Norðurdjúpi.

Innanlandsflug hefst ekki samkvæmt áætlun en næstu fregnum af þvi er að vænta upp úr klukkan níu. Það var fellt niður síðdegis í gær vegna óveðurs.

Millilandaflug virðist hinsvegar ætla að ganga hnökralaust. Þrátt fyrir hvassar vindhviður undir morgun, hafa ekki borist fregnir af foki eða óhöppum á vegum, enda var umferð á vegum í algjöru lágmarki í nótt, samkvæmt teljurum Vegagerðarinnar. Annars eru vegir víðast hvar orðnir auðir, sem dregur úr hættu vegfarenda í hvassviðrinu.