Þingmenn Bjartrar framtíðar vilja leggja niður mannanafnanefnd

Þingflokkur Bjartrar framtíðar hefur lagt fram frumvarp þess efnis að mannanafnanefnd verði lögð niður og öll ákvæði um hana felld brott úr lögum um mannanöfn. Einnig er lagt til að þær kvaðir sem lög um mannanöfn fela í sér varðandi ættarnöfn verði felldar brott.

Frumvarpið felur í sér að hlutverk mannanafnanefndar verði flutt til þess ráðherra sem fer með þennan málaflokk og það verði hlutverk hans að skera úr álitamálum sem upp kunna að koma í sambandi við nafngiftir, nafnritun og fleira.

Í greinargerð frumvarpsins segir að nöfn manna hafi verið talin einn mikilvægasti þáttur sjálfsmyndar þeirra og varði fyrst og fremst einkahagi fólks og persónurétt þess en síður hagsmuni alls almennings. Með frumvarpinu er lagt til að heimilt verði hverjum manni að kenna sig til föður eða móður nema hann kjósi að bera ættarnafn. Einnig er lagt til að fellt verði brott það ákvæði að óheimilt sé að taka upp nýtt ættarnafn hér á landi.