Stúlkur líklegri til að skaða sig eftir kynferðisofbeldi í æsku

Hvernig takast unglingar sem orðið hafa fyrir kynferðisofbeldi í barnæsku á við reynslu sína? Og er munur á kynjum? Sigrún Sigurðardóttir, lektor við Háskólann á Akureyri, hefur rannsakað langtímaáhrif kynferðisofbeldis á fólk og hefur nú skrifað grein um málið sem birt verður í vísindatímaritinu Scandinavian Journal of Public Health.

„Fólkið sem ég tók viðtöl við lýstu öll mikilli þrautargöngu sem enn sér ekki fyrir endann á,“ segir Sigrún í samtali við Akureyri vikublað í dag. Hún segir mikilvægt fyrir fagfólk, sérstaklega í skóla- og heilbrigðiskerfinu, að þekkja einkenni og afleiðingar kynferðislegs ofbeldis til að geta brugðist rétt við.

Háskólinn á Akureyri býður til málstofu í tilefni af 16 daga átaki gegn kynbundnu ofbeldi. Þar mun Sigrún fjalla um málefnið og rannsóknir sínar. Hún segist sjá mun á því hvernig stúlkur og drengir bregðist við áfalli eftir kynferðisofbeldi. Stúlkurnar glími oft við mikla sálræna vanlíðan og séu líklegri til að skaða sjálfar sig. Drengirnir aftur á móti séu líklegri til þess að fara í áfengis- og fíkniefnaneyslu, leiðist út í afbrot og sýni meiri reiði og árásargirni.

Lesa má viðtalið við Sigrúni í heild sinni á vefsíðu Akureyri vikublaðs, en málstofan fer fram á morgun í Háskólanum á Akureyri á milli klukkan 12:10 og 12:55. Hún er öllum opin og í stofu M101. Þá verður málstofan einnig send út í beinni útsendingu í vefvarpi háskólans.