Heiður að fá að spila í einni flottustu sinfóníu heims

„Ég held að það væri heiður að fá að spila í einni flottustu sinfóníu heims og það væri dýrmætt fyrir frekari frama í tónlistinni,“ sagði Vilhjálmur Árnason, þingmaður Sjálfstæðisflokkins, í umræðum um störf þingsins í dag. Hann lagði út af orðum Elliða Vignissonar, bæjarstjóra Vestmannaeyja, sem varpaði fram þeirri spurningu í síðustu viku hvort 320 þúsund manna þjóð hefði efni á að reka Þjóðleikhús.

Vilhjálmur sagðist hafa fundið að þrátt fyrir að margir væru ósammála Elliða væru margir sammála honum. Sjálfur bar Vilhjálmur í sinni ræðu dagvinnulaun kvenna í lögreglunni saman við dagvinnulaun kvenna í Sinfóníuhljómsveit Íslands. Fyrrnefndar konur eru með 305.700 krónur á mánuði samkvæmt Vilhjálmi en konur í Sinfóníuhljómsveit Íslands ná 416.960 krónur í meðallaunum á mánuði.

Eins og sjá má á myndandinu hér að neðan þá segir Vilhjálmur að „menning og listir séu nauðsynleg en við höfum ekkert við það að gera meðan við tryggjum ekki öryggi okkar og heilsu.“