Íslendingar hafa fiðrildaáhrif

Óhætt er að segja að Íslendingar séu að standa fyrir fiðrildaáhrifum þessa daganna.

„Lítill vængjasláttur í norðri getur haft stór áhrif á veðurkerfi hinum megin á hnettinum, en miðasala á Fiðrildafögnuð UN Women gengur vonum framar. Nú fer hver að verða síðastur að tryggja sér miða á á þetta frábæra kvöld,“ segir Inga Dóra Pétursdóttir framkvæmdastýra UN Women á Íslandi.

Fiðrildafögnuður UN Women fer fram í Hörpu annað kvöld og verður boðið upp á mikla skemmtun.

Fram koma Sigríður Thorlacius og Högni Egilsson í Hjaltalín, landsþekktar leikkonur verða með gjörning, hljómsveitin Eva tekur lagið, dansarar úr Íslenska Dansflokknum flytja fallegt verk og DJ Yamaho þeytir skífum. Þá verður boðið upp á óvænta „bombu“ í lok kvölds.

„Þetta verður einstakt kvöld. Við fáum að skyggnast inn í líf nokkurra indverskra kvenna sem lifað hafa af sýruárásir en þær komu saman á Indlandi á dögunum og tóku meðal annars þátt í því að búa til vinaböndin sem eru aðgöngumiði gesta á fögnuðinn,“ segir Inga Dóra.

„Við höfum séð áður að samtakamáttur okkar hér heima getur komið af stað flóðbylgju breytinga.“

Miðasala fer fram á miði.is og í verslun ELLU, Kronkron, Skarthúsinu og Indiska.