Vogunarsjóðir funda með Seðlabanka og Glitni

Einn kröfuhafa föllnu íslensku bankanna segist hafa vonast eftir því að þeir byrjuðu að fá greitt inn á kröfur sínar á þessu en hægt hafi á ferlinu eftir Alþingiskosningarnar í vor. Bloomberg greinir frá þessu.

Í frétt Bloomberg segir að þegar bankarnir féllu árið 2008 hafi vogunarsjóðir flykkst til landsins til að reyna að græða á því að kaupa upp kröfur. Fimm árum síðar séu þeir enn að bíða.*

Andrew Jent, forseti Hayman Capital Management LP, sem er meðal erlendu kröfuhafanna sagði að þeir hefðu loksins fengið vilyrði fyrir fundi með Seðlabanka Íslands og slitastjórn Glitnis sem á að vera haldinn þann 18. nóvember nk. Hann segist þó ekki líta á fundinn sem upphaf formlegra samningaviðræðna.

Vogunarsjóðirnir segja að íslenska ríkisstjórnin muni á endanum þurfa að sleppa tökunum ef hún vill komast inn á alþjóðlega markaði og laða til sín erlenda fjárfestinga.

„Ríkisstjórnin skilur að ef hún framkvæmir eignarnám á kröfunum eða leggur skatta á endurgreiðslur verði það henni til vandræða,“ segir Jent í samtali við Bloomberg. „Hún getur ekki viljað enda í sömu stöðu og Argentína,“ bætir hún við, en Argentína gat ekki greitt erlendar skuldir sínar á árinu 2011 og neyddist til að setja hömlur á innflutning til landsins, gjaldeyrishöft og ríkisvæða ýmis einkafyrirtæki til að koma í veg fyrir stórfelldan fjármagnsflótta frá landinu. Þrátt fyrir það er gjaldeyrisforði landsins geysilega illa staddur þar sem þessar ráðstafanir fældu erlenda fjárfestingu frá landinu.

Jent áætlar að um tuttugu vogunarsjóðir eigi nægilega mikið undir til að ferðast til Íslands til að sækja fundinn.

Í fréttinni kemur fram að Davíð Oddsson, fyrrverandi forsætisráðherra og seðlabankastjóri, hafi sagt í Morgunblaðinu í síðasta mánuði að kröfuhafar Kaupþings og Glitnis ættu að gefa eftir 75% af krónueignum sínum.

Þó nokkrir framkvæmdastjórar mismunandi vogunarsjóða hafa sagt að þeir búist við því að tapa einhverju á þessum viðskiptum en þeir sjái nefnda 75% eftirgjöf sem byrjunarreit í viðræðum við Íslendinga.

Jent sagði að staða forsætisráðherra og fjármálaráðherra Íslands væri fyndin. Það liti út fyrir að þeir væru sitthvoru megin borðsins og sækjast eftir sitthvorri niðurstöðunni úr viðræðunum.

„Við höfum átt í erfiðleikum með að negla það niður nákvæmlega við hvern við eigum að semja,“ sagði Jent.