Keyrði nokkra kílómetra eftir bílveltu

Rjúpnaveiðimaður missti stjórn á lítilli jeppabifreið í hálku í gærmorgun með þeim afleiðingum að hún hafnaði utan vegar og fór eina veltu. Óhappið varð skammt vestan við Búðardal.

Þetta kemur fram á fréttavefnum búðardalur.is.

Bifreiðin hafnaði á hjólunum og slapp ökumaðurinn ómeiddur. Hann gat skipt um eitt dekk sem hafði affelgast við óhappið og ók síðan nokkra kílómetra til baka í Búðardal þar sem hann gerði vart við sig.

Eins og sjá má á myndinni er bifreiðin mikið skemmd og mikið mildi að ekki fór verr. Bílbeltin gerðu sitt gagn og slapp því ökumaðurinn ómeiddur.