Íslensk börn í hlutverki orrustuflugmanna

Í kjölfar brottfarar varnarliðsins frá Íslandi árið 2006 samþykkti fastaráð Atlantshafsbandalagsins að komið yrði á reglulegri loftrýmisgæslu umhverfis Ísland. Tilgangurinn er að viðhalda þekkingu á aðstæðum á Íslandi og í norðrinu svo hægt sé að bregðast skjótt og skilvirkt við þurfi Ísland á aðstoð flugsveita bandalagsríkja að halda. Þá skal fyrirkomulagið tryggja að hérlendis sé til staðar þekking og reynsla til að taka á móti erlendum flugsveitum.

Liðsmenn bandaríska flughersins hafast við á Suðurnesjum og Akureyri til loka mánaðarins og á Suðurnesjum var í dag tekið vel á móti Ingibjörgu Aþenu Magnúsdóttur og Júlíusi Davíð Júlíussyni Ajayi.

Dagurinn hófst á að krakkarnir voru klæddir í viðeigandi flugbúninga sem voru merktir þeim, eins og hjá öllum alvöru flugmönnum. Þau fengu síðan að skoða ýmsan útbúnað og vöktu nætursjónaukarnir sérstakan áhuga. Krakkarnir skoðuðu meðal annars orrustuþotu, björgunarflugvél sem ófáir hermenn hafa stokkið úr í fallhlíf og gamla eldsneytisbirgðavél, sem þó er í fullu fjöri. Þau voru sátt við ævintýri dagsins sem má sjá allt um í meðfylgjandi sjónvarpsfrétt.