Stemmning á vinnustöðum fyrir stóru stundina

Þjóðin er tilbúin í leikinn gegn Króötum og mörgum fannst tíminn líða hægt í dag. Á vinnustöðum var víða frábær stemmning, Hrund Þórsdóttir kíkti á nokkra.

Í verslun Nýherja mættu menn klæddir í samræmi við tilefnið og þar vantaði ekkert upp á stemmninguna.

Á pizzastöðunum hefur víða verið gjörsamlega fullt út úr dyrum enda margir eflaust fegnir að sleppa við að elda á svona degi. Þar var kallaður út aukamannskapur á vaktina enda búist við erilsömu kvöldi.

Búið var að loka útibúi Landsbankans við Lækjargötu þegar okkur bar að garði, en þar var sannkölluð fótboltaveisla í allan dag og starfsmenn voru ennþá í feiknastuði, eins og sjá má vel í meðfylgjandi myndbandi.