Tjá sig um gyðingahatur

Natalie Portman sagði í viðtali við The Telegraph að utan heimsborga á borð við New York og Los Angeles geti verið hættulegt að vera gyðingur. Hún segir að viðhorf gagnvart gyðingum séu fjölbreytileg; sumir þekki ekki til gyðingdóms og aðrir séu jafnvel fjandsamlegir í garð gyðinga.

Woody Allen lét nýlega þau orð falla í viðtali við ísraelsku sjónvarpsstöðina Channel 2 að í sumum tilfellum sé pólitísk gagnrýni á Ísraelsríki í raun einungis gyðingahatur í dulargervi.

Hann styður Ísraelsríki og segist hafa gert það frá stofnun þess en hefur aldrei sótt það heim. Þetta kemur fram í blaðinu The Times of Israel. Hann segir aftur á móti að það sé ekki erfitt að vera gyðingur í Bandaríkjunum. Þar séu menn almennt jákvæðari í garð gyðinga en annars staðar í heiminum.