Þóra Tómasdóttir ekki brotleg við siðareglur BÍ

„Mér fannst þetta fyrirsjáanleg niðurstaða og það er gott að vita til þess að maður hafi stuðning siðanefndarinnar í svona mikilvægu og að mörgu leyti flókna máli,“ segir Þóra Tómasdóttir, ritstjóri Nýs lífs í samtali við Vísi.

Siðanefnd Blaðamannafélags Íslands hefur úrskurðað í máli Egils Einarssonar og Guðríðar Jónsdóttur gegn Þóru vegna viðtals í blaðinu við Guðnýju Rós Vilhjálmsdóttur, sem kærði Egil og Guðríði fyrir nauðgun.

Töldu Egill og Guðríður að ákveðin atriði í viðtalinu vörðuðu ákvæði siðareglna um vönduð vinnubrögð sem og að blaðamenn skulu í umfjöllun um dóms- og refsimál virða þá meginreglu laga að hver maður skuli talinn saklaus uns sekt hans sé sönnuð. Tilgreindu þau 16 atriði er þau töldu rangfærslur í viðtalinu.

Þá gerðu þau einnig alvarlegar athugasemdir við fréttatilkynningu er Þóra sendi frá sér í kjölfar yfirlýsingar Guðríðar vegna viðtalsins.

Siðanefndin sagði í niðurstöðu sinni að hún geri enga athugasemdi við það fréttamat Nýs lífs að birta viðtal við Guðnýju Rós þar sem hún lýsir sinni upplifun af máli sem allmjög hafi verið til umfjöllunar í fjölmiðlum. Ekkert hafi komið fram sem bendi til þess að rangt hafi verið haft eftir henni í viðtalinu eða eftirmála.

Telur siðanefndin að ákveðin atriði viðtalsins hefðu getað verið vandaðri, einkum lýsingar á áverkum Guðnýjar Rósar sem og yfirlýsingar Þóru um að hún hafi gefið Agli tækifæri á að koma sínum sjónarmiðum á framfæri þegar hún í reynd virtist hafa átt við að hún myndi gefa honum tækifæri til þess í næsta tölublaði. Nefndin kemst þó að þeirri niðurstöðu að hvergi hvíli skylda á Nýju lífi til að gefa Agli og Guðríði andmælarétt og að Nýtt líf hafi kynnt ítarlega þau sjónarmið um nauðgunarkæruna og eftirmála hennar sem Egill hafi birt í fjölmiðlum áður en tölublaðið kom út. Á það verði að líta að mörg atriði málsins sem til umfjöllunar er í blaðinu voru löngu kunn úr fyrri um fjöllun fjölmiðla, nema helst lýsingar Guðnýjar Rósar á sinni upplifun og afstöðu.

Sú skýring Þóru að hún hafi viljað leyfa Guðnýju Rós að lýsa sinni upplifun er því alls ekki úr lausu lofti gripin segir í niðurstöðu siðanefndarinnar. Þóra teljist þannig ekki hafa gerst brotleg við siðarreglur Blaðamannafélags Íslands.