Fórnarlamb Castro í dramatísku viðtali hjá Dr. Phil

Ariel Castro lokkaði Michelle Knight inn á heimili sitt með því að segja henni frá hvolpum sem hann ætti þar. Hann lofaði henni að hún gæti tekið einn með sér heim handa syni sínum sem þá var tveggja ára. CNN greindi frá þessu en Michelle mætti í sjónvarpsviðtal hjá Dr. Phil í vikunni.

Michelle var 21 árs árið 2002 þegar Ariel Castro læsti hana inni á heimili sínu þar sem hún var í ellefu ár þar til nágranni Ariels Castro bjargaði þeim úr vistinni.

Hún segist hafa áttað sig á því fljótlega að það voru engir hvolpar á heimili mannsins. Það hafi ekki liðið langur tími þar til hann hafi farið með hana í herbergi á efri hæð hússins þar sem hann batt hana niður.

Michelle segir að vonin um að hitta son sinn aftur hafi haldið í henni lífinu. Hún vill að sonur sinn viti að hún sé sigurvegari en ekki fórnarlamb. „Ég vildi líka hann vissi að ég elska hann og það var sú ást sem kom mér í gegnum þetta.“

Michelle var fyrsta konan af þremur sem hann lokaði inni. Hann beitti konurnar grófu ofbeldi og nauðgaði þeim meðal annars með hrottalegum hætti.

Michelle og hinar konurnar tvær, Amanda Berry og Gina DeJesus, hafa reynt að eignast eðlilegt líf eftir að þær fengu frelsið á ný.

Michelle lýsir því í viðtalinu þegar Ariel Castro setti keðjur um háls hennar og festi hana við stálgrindur í kjallara heimili síns. Þá sagði hann við hana: „Ef ég bind of fast og þú deyrð, þá þýðir það að þér hafi ekki verið ætla að lifa og að Guð hafi viljað fá þig til sín.“

Hún segir að hún hafi stundum verið látin vera föst í keðjum við stöngina í marga daga í röð. Hún hafi ekki getað lagst niður. Ariel Castro hafi sett mótóhjólahjálm á höfuð hennar sem gerði henni erfitt að anda. Hún segir að það hafi oft liðið yfir hana og hún vissi ekki hvað fór fram í kringum hana.

Hún segir að hún hafi ekki alltaf reynt að berjast á móti, að minnsta kosti ekki til þess að byrja með. Í fyrstu hafi hún verið í áfalli yfir þessu öllu og hún hafi stanslaust grátið og beðið hann um að sleppa sér. Þegar hún hafi reynt að flýja hafi henni verið refsað harkalega. Hann hafi tekið rör og haldið því yfir hausnum hennar og sagst ætla að troða rörinu niður um háls hennar og drepa hana. Hún hafi ekki öskrað eða gefið frá sér nein hljóð við þetta, hún hafi bara legið kyrr.

Hvarf Michelle fékk minni athygli en hvarf hinna tveggja

Hvarf Michelle fékk minni athygli en mál hinna stúlknanna tveggja í fjölmiðlum. Fjölskyldur þeirra héldu málum þeirra við og auglýstu eftir þeim með veggspjöldum og héldu minningarathafnir.

Amma Michelle lýsti því yfir þegar Michelle hvarf að fjölskyldan héldi hún hefði látið sig hverfa því hún hafi verið reið vegna þess að hún missti forsjá yfir syni sínum. Lögreglan studdi þessar staðhæfingar fjölskyldunnar.

Í viðtalinu hjá Dr. Phil sagði Michelle að sonur hennar hafi verið tekinn af henni vegna þess að móðir kærasta hennar beitti drenginn ofbeldi. Hún segir barnaverndaryfirvöld hafa sagt að hún hafi ekkert gert til þess að vernda son sinn en það sé ekki rétt. Hún hafi gert allt sem hún gat til þess að vernda hann og halda honum og það mál hafi enn verið til meðferðar þegar hún hvarf.

Í viðtalinu lýsir Michelle barnæsku sinni sem hún segir að hafi verið erfið. Þess vegna hafi hún ekki viljað hitta móður sína eftir að hún öðlaðist fresli á ný. „Ég vildi óska þess að mamma mín væri ekki mamma mína. Ég mátti aldrei fara út og ekki eiga vini,“ segir hún.

Móðirin, Barbara Knight, hefur sent frá sér yfirlýsingu vegna þessa þar sem hún segir að hið áralanga ofbeldi sem Michelle varð fyrir af hálfu Ariel Castro hafi skekkt sýn hennar á hvernig æska hennar raunverulega var. Henni þykir miður að heyra dóttur sína tala um sig með þessum hætti. Hún elski dóttur sína og hafi alltaf gert og muni alltaf gera. Hún biður til Guðs að einn daginn verði dóttir hennar búin að jafna sig þannig og átta sig á því að lífið hennar var ekki alltaf erfitt.

Hér að neðan má sjá brot úr viðtalinu við Michelle hjá Dr. Phil.