Ef þú átt ekki jólapeysu - prjónaðu þá eina og láttu gott af þér leiða

Meðfylgjandi myndir voru teknar í Jólalandi Blómavals í dag þegar áheitavefurinn Jolapeysan.is - Barnaheill - Save the Children á Íslandi var formlega opnaður. Aðstandendur átaksins komu saman klæddir í þetta svona líka skemmtilegar jólapeysur.

Jólapeysan.is virkar líkt og hlaupastyrkur. Þátttakendur skrá sig þar og keppast um að fá sem hæst áheit út á jólapeysuna sína. Átakinu lýkur formlega föstudaginn 13. desember. 

Ragnheiður Eiríksdóttir prjónakona með meiru og stofnandi Knitting Iceland hannaði Jólapeysuna 2013. Jón Gnarr klæðist peysunni á auglýsingum átaksins. Uppskrift peysunnar má kaupa til stuðnings átakinu í verslunum Hagkaupa sem og í helstu lopasöluverslunum landsins.

Jón Gnarr borgarstjóri og Anna Svava Knútsdóttir leikkona leggja átakinu lið. Þannig hvetur Jón til dæmis fólk til að prjóna sínar eigin peysur en Anna Svava hvetur fólk til dáða með veitingar.

Keppt í nokkrum peysuflokkum

Á Facebook og Instagram verður keppt í nokkrum flokkum um bestu peysuna. Þannig verða veitt verðlaun fyrir bestu nördapeysuna, glamúrpeysuna, frumlegustu peysuna ljótustu peysuna og auðvitað fallegustu jólapeysuna 2013.

Fyrirmyndin er bresk

Á Jólapeysan.is eru ýmsar hugmyndir og uppskriftir af því hvernig útbúa má jólapeysur og halda skemmtilega jólapeysugleði en þar er einnig að finna prjónauppskriftir af jólapeysum ásamt ýmsu öðru efni sem auðveldar skipulagningu og framkvæmd. 

„Það er gaman að geta slegið tvær flugur í einu höggi og geta boðið upp á skemmtun um leið og maður óskar eftir stuðningi við verkefni Barnaheilla,” segir Erna Reynisdóttir framkvæmdastjóri samtakanna. 

Fyrirmyndin að átakinu er sótt til Save the Children í Bretlandi, sem hóf sams konar fjáröflunarátak á síðasta ári sem var afar vel tekið af almenningi;

„Þar er jólapeysan auðvitað hluti af menningunni en okkur fannst vera kominn tími til að brydda upp á nýjungum hér á Íslandi og þess vegna tilvalið að lífga upp á tilveruna með jólapeysum.”

Notaðu hugmyndaflugið

„Við hvetjum fólk til að nýta hugmyndaflugið og skapa frumlegar og skemmtilegar jólapeysur en þetta er auðvitað líka tilvalið tækifæri til að skora á aðra og fá þá til að gera einhverja hluti ef ákveðin upphæð næst í áheitum. Það verður gaman að sjá hvað fólki dettur í hug," segir Erna að lokum.

Jolapeysan.is.