Húsfyllir í Háskólabíói

Háskólabíó fylltist út úr dyrum í gærkvöldi á fyrirlestrum afreksfólksins Vilborgar Örnu Gissurardóttur, suðurpólfara og Leifs Arnar Svavarssonar, fjallamanns sem fór upp norðurhlið Everest.

Slysavarnafélagið Landsbjörg var einnig á staðnum og kynnti upplýsingavefur Safetravel.is um örugga ferðamennsku á Íslandi.

Vilborg hreif húsið með sér í skemmtilegri og einlægri frásögn af sjálfri sér og markmiðum sínum sem leiddu hana á Suðurpólinn. 

Helgi Rúnar Óskarsson, hjá 66˚Norður sem stóð að viðburðinum var hæstánægður með kvöldið. „Við þurfum að leita aftur fyrir daga sjónvarps til að sjá eitthvað þessu líkt, þegar ferðalangar komu af framandi slóðum og fylltu heilu samkomuhúsin með ferðasögum og myndasýningum. Hingað í kvöld kom ólíklegasta fólk, úr öllum áttum og á öllum aldri og allir hrifust með þessum mögnuðu fyrirlestrum. Þetta er skýrt merki um þá vaxandi bylgju af áhuga fólks á útivist og hreyfingu sem við finnum svo vel fyrir. Það er eitthvað mikið að gerast í þessum efnum hjá þjóðinni.“ 

Leifur Örn sýndi hrikalegar myndir frá norðurhlið Everest sem kostað hefur marga fjallgöngumenn lífið.