28 daga hreinsun

Sigrún Kjartansdóttir, 55 ára, kennari í World Class byrjar með námskeið í byrjun nóvember sem ber yfirskriftina „28 daga hreinsun með mataræði og hreyfingu“. Við spurðum Sigrúnu um námskeiðið og hreinsunina sem gengur út á að borða rétt og hreyfa sig samhliða því en margir sem hafa sótt þessi námskeið hjá Sigrúnu hafa náð kjörþyngd á heilbrigðan hátt að hennar sögn.

Fyrir fólk sem finnur fyrir sjúkdómseinkennum

„Námskeiðið er í raun fyrir alla, bæði konur og karla, unga og þá sem eldri eru. Bæði fyrir þá sem eru í dag við góða heilsu en vilja læra hvernig þeir geta viðhaldið góðri heilsu það sem eftir er ævinnar og komið í veg fyrir ýmsa lífsstílstengda sjúkdóma sem og einnig fyrir þá sem eru farnir að finna fyrir ýmsum sjúkdómseinkennum eins og hækkandi blóðþrýstingi, gigt og verkjum í liðum, umframþyngd, metingar- og ristilsjúkdómum, sykursýki II, húðsjúkdómum, ofnæmi, orkuleysi, þunglyndi, streitu, kvíða, svefnleysi og fleiru,“ segir Sigrún spurð fyrir hverja námskeiðið er.

„Fyrir þá sem ekki hafa hreyft sig lengi, þá byggi ég æfingarnar í tímunum upp á æfingum þar sem við notumst við léttar brennsluæfingar og styrktaræfingar byggðar á eigin þyngd og léttum lóðum. Hver og einn gerir eingöngu það sem hann getur og treystir sér til en við gerum allar æfingar saman," segir hún.

Mataræðið skiptir lykilmáli

Er mataræðið líka mikilvægt þegar kemur að átaki sem þessu - 28 daga hreinsuninni? „Mataræðið skiptir lykilmáli. Við erum það sem við borðum, þannig að ef mataræðið okkar er að stórum hluta næringarsnauður matur, borðaður á óreglulegum tímum, jafnvel í of miklu magni þá vinnur líkaminn ekki rétt."

„Frumur líkamans fá ekki þá næringu sem þær þurfa og ná því ekki að skila sínu hlutverki við að viðhalda sér og halda okkur heilbrigðum. Maturinn skiptir lykilmáli og við verðum að líta á matinn eins og „fóður" eða orkugjafa sem gerir okkur kleift að gera allt sem við þurfum að gera - ekki bara eitthvað bragðgott sem gleður okkur. Við verðum að skilja þarna á milli," segir hún.

Láttu matinn vera lyfin þín

En aðeins að þér – hver er þinn bakgrunnur í líkamsrækt? „Ég er á besta aldri og hef í gegnum tíðina alltaf haft mikinn áhuga á hreyfingu og heilsurækt. Ég kynntist aðferðafræðinni um hreina mataræðið og lækningamætti hans fyrir nokkrum árum og hef séð þau undur og stórmerki sem hann hefur á fólk. Fólk getur hreinlega í mjög mörgum tilfellum læknað sig með réttu mataræði. Það þarf ekki lyf í öllum tilfellum."



„Ég segi oft: „Láttu matinn vera lyfin þín!" Ég elskaði leikfimi sem barn og unglingur, spilaði og keppti í körfubolta sem unglingur, æfði og keppti í samkvæmisdansi í nokkur ár. Ég tók meira að segja þátt í fjórum heimsmeistaramótum í suður-amerískum dönsum fyrir Íslands hönd og hef hlaupið mjög mörg hálfmaraþon og nokkur heil maraþon. Ég kenni Zumba-fitness og get mjög illa verið án hreyfingar. Allir ættu að setja hreyfingu inn í daglegt líf sitt því hreyfingin gerir manni svo gott, ekki bara líkamlega heldur líka andlega.“