Hraunavinir ætla að hindra vinnuvélar

Reynir Ingibjartsson og félagar í Hraunavinum eru að stilla sér upp við Gálgahraun. Þeir ætla sér að hindra vinnuvélar í að komast að hrauninu.

Þegar fréttastofa heyrði í Reyni nú fyrir hálftíma, eða klukkan 07:30, var nokkur hópur mættur út á Álftanes en að hans sögn drífur að mannskap. "Þarna kemur Ómar Ragnarsson. Mér sýnist þetta vera jeppinn hans," sagði Reynir.

Hrollkalt er á Álftanesi og vindur en engan bilbug er að finna á Hraunavinum sem ætla að stilla sér upp fyrir framan vinnuvélar ÍAV og koma þannig í veg fyrir að þær nái að vinna á Gálgahrauni. Reynir segir að farið hafi verið fram á lögbannskröfu á framkvæmdirnar, það mál sé óafgreitt og í ljósi þess lýsir hann framkvæmdirnar siðlausar.