Þrjú skipuð í embætti héraðsdómara

Innanríkisráðherra hefur skipað í þrjú embætti héraðsdómara. Sigríður Elsa Kjartansdóttir var skipuð í embætti dómara við héraðsdóm Vestfjarða og þau Sigríður J. Hjaltested og Þórður Clausen Þórðarson voru skipuð dómarar við héraðsdóm Reykjavíkur. Embættin voru auglýst laus til umsóknar þann 6. júní síðastliðinn. Þetta kemur fram í tilkynningu frá ráðuneytinu í dag.

Samkvæmt 4. gr. laga um dómstóla nr. 15/1998 skilaði dómnefnd umsögn sinni um umsækjendur um embættin og var niðurstaða dómnefndar sú að af þeim umsækjendum sem sóttu um embætti dómara við héraðsdóm Reykjavíkur hafi Sigríður J. Hjaltested verið hæfust og að henni frátalinni hafi Sigríður Elsa Kjartansdóttir og Þórður Clausen Þórðarson verið hæfust. Þá telur nefndin að af þeim sem sóttu um embætti dómara við héraðsdóm Vestfjarða hafi Arnaldur Hjartarson og Sigríður Elsa Kjartansdóttir verið hæfust til að hljóta skipun í það embætti.