Loksins aðgengi fyrir fatlaða í MS

Niðurrif á gamalli byggingu Menntaskólans við Sund hófst í gær. Byggingin sem er frá því um 1950 var í upphafi barnaskóli og hluti af Vogaskóla.

Að sögn Más Vilhjálmssonar, rektors við Menntaskólann við Sund hefur byggingin verið í fullri notkun þar til síðasta vor. Um áramótin hefjast framkvæmdir á nýrri byggingu sem verður á sama stað sem gamli skólinn er nú. Nýja byggingin verður 2700 fermetrar og því er ljóst að skólinn stækkar því töluvert.

Már segir að í nýju byggingunni verði gert ráð fyrir aðgengi fatlaðra. Eins og staðan sé í dag sé í raun útilokað fyrir fatlaða og hreyfihamlaða að komast um skólann. Engar lyftur séu í skólanum og byggingin á mörgum hæðum eða plönum. Með nýju framkvæmdunum koma tvær lyftur og allt og byggingin verður á einu plani.

„Þetta er búið að vera skelfilegt ástand í raun og veru og merkilegt að þetta hafi viðgengist svona lengi,“ segir Már.

„Opinberar stofnanir eiga að hafa aðgengi fyrir fatlaða og við höfum lent í vandræðum vegna þessa og einnig þegar nemendur fótbrotna þá komast þeir ekki um skólann.“

Már segir að það skipti ótrúlega miklu máli fyrir nemendur. Loksins verður matsalur og nemendum boðið upp á aðstöðu til þess að halda samkomur en hingað til hafi ekki verið neitt rými fyrir nemendur þegar þeir koma úr úr kennslustundum.

„Ástandið hefur verið langt í frá boðlegt miðað við þær kröfur sem gerðar eru í dag og það er frábært að fá nýju bygginguna,“ segir Már.