Mikil stemmning í Reykjavíkurmaraþoninu

Dagskrá Menningarnætur hófst í morgun með Reykjavíkurmaraþoninu. Um 14000 manns tóku þátt í maraþoninu en þátttakan hefur aldrei verið meiri.

Þá söfnuðust tæplega 67 milljónir til styrktar góðra málefna samkvæmt heimasíðunni hlaupastyrkur.is, þar sem áheitasöfnun fer fram.

Ólafur Ragnar Grímsson, forseti Íslands, ræsti maraþonið, sem eru 42 kílómetrar, og hálf-maraþonið, sem eru 21 kílómetri. Þeir hlauparar fóru fyrst af stað klukkan 8.40 í morgun.

Jón Gnarr, borgarstjóri, ræsti svo tíu kílómetra hlaupið, rétt rúmlega hálf tíu í morgun.

Skemmtiskokkið hefst svo klukkan 12.15, en það eru þrír kílómetrar.

Þetta er í þrítugusta sinn sem Reykjavíkurmaraþonið er haldið. 

Fyrsta hlaupið var haldið 24. ágúst, 1984.

Að sögn hlauparanna var ekki jafn margt í bænum og undanfarin ár, og telja margir veðrið þar spila inn í. En óvenju mikil stemning hafði myndast á leiðinni, þar sem íbúar stóðu meðfram hlaupaleiðinni og hvöttu hlauparana áfram.

Þá voru hljómsveitir sem spiluðu á leiðinni fyrir áhorfendur og hlaupara.