Göngum flýtt

Fjallskilastjórar í Þingeyjarsýslu hafa ákveðið að flýta göngum í allri Suður-Þingeyjarsýslu og Kelduhverfi í ljósi þess að útlit er fyrir mjög slæmt veður á svæðinu um komandi helgi.

Þetta var ákveðið í gærkvöldi eftir fundi með sýslumanni og almannavörnum að því er fram kemur á Þingeyska fréttamiðlinum 641.is. Þar segir ennfremur að sumstaðar verði lagt af stað í göngur strax í dag en á morgun og fimmtudag á öðrum svæðum. Mikill einhugur er sagður hafa verið á meðal bænda um málið enda mikið undir. Stefnt er á að rétta í flestum réttum sýslunnar áður en óveðrið skellur á og vonast bændur eftir skaplegu veðri fyrrihluta föstudags til þess.

Þá segir á fréttavefnum Akureyri Vikublað, að fréttir hafi einnig borist af því að göngum og réttum verði flýtt í Skagafirði og í Grýtubakkahreppi.