Tölvupóstur fyrir breytta tíma

Nýstárleg tölvupóstþjónusta sem runnin er undan rifjum tveggja íslenskra hugbúnaðarverkfræðinga hefur nú safnað um sex milljónum í alþjóðlegri styrktarsöfnun. Þeir vilja mæta eftirspurn eftir öruggum samskiptum í gegnum internetið enda sé þörf á úrbótum í þeim efnum.

Frá því að mál bandaríska uppljóstrarans Edward Snowdens komst í hámæli í vor hefur netfrelsi, persónuupplýsingar og njósnir verið á allra vörum.

Snowden svipti hulunni af víðtækum njósnum bandarískra og breskra yfirvalda en svo virðist sem að leyniþjónustur landanna hafi haft nær óheftan aðgang að gagnaþjónum stærstu tæknifyrirtækja veraldar.

Þannig hefur viss eftirspurn myndast eftir öruggum leiðum til að geyma, senda og taka á móti upplýsingum. Þeir Smári McCarthy, pírati, og tölvunarfræðingurinn Bjarni Rúnar Einarsson, freista þess nú að mæta þessari eftirspurn með Mailpile. Hér er um að ræða þjónustu sem einfaldar notkun dulritunar í tölvupósti.

„Þetta er hugbúnaður sem keyrir á tölvunni þinni, en notar engu að síður vafrann,“ segir Bjarni. „Viðmótið er áþekkt því sem fólk notar nú þegar.“

Styrktarfé kemur frá fólki víðsvegar um heiminn í gegnum  fjáröflunarvefinn Indiegogo. Sem stendur hafa félagarnir safnað helming þess sem stefnt var að.

Mailpile er hugarfóstur Bjarna Rúnars. Að verkefninu koma einnig Smári og hönnuðurinn Brennan Novak.

„Fólk virðist vera spennt fyrir þessu. Ég hef haft það á tilfinningunni að það hafi verið að myndast eftirspurn eftir nýjungum í tölvupóstsamskiptum.“

„Það hafa verið sívaxandi áhyggjur af því að við séum að setja öll okkar persónulegu gögn og samskipti í hendur þriðja aðila. Þetta á sérstaklega við um okkur Íslendinga þar sem gögnin fara yfirleitt til aðila erlendis. Það er eftirspurn eftir einhverju nýju og við viljum mæta henni.“