Við Halldór verðum hengdir

Gylfi Ægisson tónlistarmaður er óvænt lentur í auga stormsins, umræðunni um stöðu samkynhneigðra á Ísland, og þykir nóg um því hann hefur svarað fyrir sig með stöku.

Forsaga málsins er sú að Halldór Jónsson verkfræðingur skrifað bloggfærslu þar sem fram kemur að honum þyki nóg um fyrirferð samkynhneigðra í samfélaginu. Margir hafa orðið til að býsnast á greininni og DV sauð upp frétt byggða á bloggfærslu Halldórs. Gylfi stakk niður penna á athugasemdakerfi blaðsins og lýsti sig sammála Halldóri. „Þegar Borgarstjórinn er farinn að klæðast Íslenska Þjóðbúningnum (Gefa skít í hann) og mála sig, verður manni óglatt. Megas vinur minn spurði mig einu sinni af hverju heitir engin gata Rassgata í Reykjavík? Mæli ég nú með því að laugarvegurinn verði skírður upp á nýtt og Látinn heita Rassgata. Það væri svo við hæfi að Jón Gnarr klipti á borðann," skrifar Gylfi. Hann lét það ekki duga og bætti við: „Börn sem horfa á og alast upp við að þetta sé allt eðlilegt finnst þetta kanski spennandi og skemmast við að sjá þetta seinna meir. Ef svo að þjóðin öll verður orðin öfug eftir nokkur ár, þarf að flytja inn börn frá Rússlandi."

Mál sem þessi vilja vinda uppá sig og DV sló þessum ummælum Gylfa upp undir fyrirsögninni: Gylfi Ægis óttast að börnin „skemmist" vegna Gay Pride.

Gylfa þykir nóg um og í morgun bauð hann vinum sínum á Facebook upp á vísu sem ætla má að loki málinu.

Æfi tímar ei lengdir,

okkur ekki í hag.

Við Halldór verðum hengdir,

Í hádeginu í dag.

Eitt er hægt að gera,

við þá deyjum ei.

Ef við þykjumst vera,

orðnir báðir gay.