Fékk krampa í bensínfótinn og flaug 34 metra ofan í Glerá

Það þykir ganga kraftaverki næst að tveir ungir menn skuli hafa sloppið lítið meiddir, eftir að ökumaður bíls þeirra fékk krampa og steig bensínið í botn, með þeim afleiðingum bíllinn tók flugið upp af vegriði og hafnaði ofan í Glerá á Akureyri laust fyrir miðnætti í gær.

Þegar pilturinn fékk krampann tók bíllinn, sem er öflugur BMW, þá skjótt viðbragð og æddi stjórnlaust áfram á milli tveggja ljósastaura og straukst við umferðarskilti. Eftir rösklega 65 metra stjórnlaust ferli, ók hann á niður dregið vegrið við brúarsporðinn, sem virkaði eins og stökkpallur, tókst þar á loft og sveif 34 metra. Bíllinn féll síðan þrjá til fimm metra niður og hafnaði á hjólunum ofan í Gleránni, sem lögreglumenn telja að hafi að líkindum orðið piltunum til lífs.

Farþeginn komst út úr bílflakinu og í land, og kallaði eftir hjálp. Lögreglumenn og slökkviliðsmenn óðu út í ánna og þurfti að beita klippum til að ná ökumanninum úr flakinu. Þeir voru báðir fluttir á sjúkrahúsið á Akureyri, þar sem gert var að sárum þeirra. Bíllinn er gjörónýtur og hífði kranabíll hann upp úr ánni í nótt