Talsmaður Nubo er bjartsýnn

„Ég fór ásamt varaforstjóra Beijing Zhongkun Investment Group, á fund Hönnu Birnu Kristjánsdóttur innanríkisráðherra í vor, þegar hún var nýbúin að taka við, segir Halldór Jóhannsson, talsmaður Huang Nubo.  Þar kynnti varaforstjórinn fyrir ráðherra hugmyndir fyrirtækisins og áhuga þeirra á að halda verkefninu um uppbyggingu hótels á Grímsstöðum á Fjöllum áfram. Á þeim forsendum þó að íslensk yfirvöld séu því hlynnt og þetta sé fjárfesting sem sé velkomin til Íslands.

„Ég er bjartsýnn á að það verði tekið á þessum málum með faglegum hætti á næstunni.“

„Ég hef trú á því að það sé hæft fólk við störf í nýrri ríkisstjórn og þau muni líta til þessara verka og fleiri sambærilegra verka með jákvæðum hætti á allra næstu dögum og vikum. Að það verði tekið á þessum málum með viðskiptalegum hætti, óháð því hvaða landi aðaleigandi er frá. Þannig verði frekar litið til mála út frá þeim viðskiptalegu hagsmunum sem þar kunna að vera fyrir okkur Íslendinga.“

„Huang Nubo hefur enn áhuga á þessum fjárfestingum, þá á fyrri forsendum og ef sú forsenda er til staðar að slík fjárfesting sé velkomin. Eins og margoft hefur komið fram þá fór nefnd um fjárfestingar útlendinga yfir okkar umsókn og mælti með því að gerður yrði fjárfestingasamningur."

„En á forsendum sem ég tel að hafi alls ekki verið viðskiptalegs  eðlis, þá dagaði það mál uppi. En við teljum og hann telur að fjárfestingin sem slík hafi ekki breyst.“