Reglur um HIV smitaða heilbrigðisstarfsmenn felldar úr gildi

„Við höfum ekki settar neinar reglur um HIV-smitaða heilbrigðisstarfsmenn,“ segir Haraldur Briem sóttvarnalæknir hjá Landlæknisembættinu. „Við höfum aldrei staðið frammi fyrir þessu vandamáli að skurðlæknar eða tannlæknar séu HIV-smitaðir."

Haraldur segir að hér á landi sé þeim sjónarmiðum fylgt að tekið yrði á slíku máli ef upp kæmi og slíkt yrði að meta eftir aðstæðum hverju sinni.

Bretar hyggjast fella úr gildi reglur sem kveða á um að HIV-smitaðir skurðlæknar, ljósmæður, tannlæknar og aðrir heilbrigðisstarfsmenn megi ekki framkvæma aðgerðir á sjúklingum. Þetta kemur fram í frétt The Guardian.

Breska landslæknisembættið segir meiri líkur á að verða fyrir eldingu en að smitast af HIV frá smituðum lækni.

Ný öflug meðferð við HIV hefur leitt til þess að að veirumagn hverfur í raun úr blóðinu. Veirumagnið helst það lágt í blóðinu að líkur á smiti eru mjög litlar.

Breska landslæknisembættið segir að aðeins sé vitað um fjögur tilfelli þar sem heilbrigðisstarfsmaður hefur smitað sjúkling og ekkert þeirra tilfella var í Bretlandi og í öllum tilvikum var læknirinn ekki í meðferð við HIV.

Embættið telur að viðhorf samfélagsins þurfi að breytast, margt hafi breyst frá því að sjúkdómurinn eða veiran smitaðist fyrst í mannfólk.

Í dag ætti ekki að tala um HIV smitaða eins og þeir hafi fengið dauðadóm. Fólk sem gengst undir slíka meðferð getur lifað eins lengi og aðrir og við góð lífsskilyrði.