„Maður heyrði bara einhverja flautu og svo var byrjað að sprengja“

Á Hampiðjureitnum svokallaða við Stakkholt 2-4 fara fram byggingaframkvæmdir og segjast íbúar í hverfinu hafa orðið fyrir miklu ónæði vegna þeirra frá því í apríl. Stofnaður hefur verið hópur á Facebook þar sem yfir 150 íbúar spjalla sín á milli um hávaðann.

Ingibjörg Torfadóttir, íbúi við Laugaveg, segir íbúana hafa farið á kynningarfund vegna framkvæmdanna en lítið af loforðum verktakans hafi staðist.

„Okkur skildist að þeir ætluðu ekki að vinna um helgar en þeir breyttu því og unnu um helgar þar til við stoppuðum það með mótmælum. Höggborinn átti bara að vera notaður til skamms tíma en það hélt áfram mjög lengi. Þær ætluðu líka að láta okkur vita ef þeir byrjuðu að sprengja en það var ekki gert. Það var bara byrjað. Maður heyrði bara einhverja flautu einhvern daginn sem maður vissi ekkert hvað þýddi, og svo var bara byrjað að sprengja.“

Mikilvægt að tilkynna um breytingar

Hávaðinn hefur minnkað eftir að byrjað var að byggja grunninn en á tveimur öðrum stöðum í nágrenninu standa yfir framkvæmdir þar sem notast er við höggbora og sprengingar. Rósa Magnúsdóttir hjá Heilbrigðiseftirliti Reykjavíkur segir reglur um hávaða við byggingaframkvæmdir skýrar.

„Það á náttúrlega að reyna að gæta þess að sem minnst ónæði verði vegna hávaðans. Verktökum ber að tilkynna með sannarlegum hætti áður en framkvæmdir hefjast. En það minnkar álagið mjög mikið ef maður veit hvenær þetta er búið og á hvaða tíma dags þetta er. Þess vegna er mikilvægt að þeir sem eru með framkvæmdirnar geri sér raunhæfar áætlanir og tilkynni þá líka um breytingar. En ef það eru hávaðasamar framkvæmdir á þeim tíma sem ekki má vera með þær þá er það bara lögreglan sem getur komið og gripið inn í ef þetta er á óleyfilegum tímum.“