Aldrei fleiri félagsskipti í júlíglugganum

Knattspyrnusamband Íslands segir frá því á heimasíðu sinni í dag að íslensk félög hafi sett nýtt met í félagsskiptum í júlíglugganum en síðasti dagur félagaskipta var í gær miðvikudaginn 31. júlí.

Félagaskiptagluggarnir hér á landi eru tveir, annars vegar frá 21. febrúar til 15. maí og hinsvegar frá 15. júlí til 31. júlí. Ekki er hægt að hafa félagaskipti innanlands eða til landsins eftir 31. júlí.

Alls voru 377 félagaskipti afgreidd af skrifstofu KSÍ í þessum seinni glugga og hafa ekki verið fleiri síðan mælingar hófust.  Flest höfðu þau verið 287 talsins en það var á síðasta ári.

Eins og jafnan þá biðu margir þangað til á síðustu stundu en 100 félagaskipti voru afgreidd síðasta dag félagaskipta og mörg liðanna í Pepsi-deildinni fengu til sín nýja leikmenn á elleftu stundu.

Það er hægt að skoða öll félagsskiptin með því að smella hér en þar er einnig hægt að þrengja leitina með því að velja ákveðin félög eða ákveðna daga.