Ferðalangar þolinmóðir í umferðinni

Þrátt fyrir mikinn þunga hefur umferðin gengið vel víðast hvar í dag. Fjölmargir hafa blásið í áfengismæla lögreglu en lítið sem ekkert er um ölvunarakstur. Varstjóri hjá Umferðardeild segir ferðalanga hafa tekið heimferðinni í dag af þolinmæði.

Viðbúnaður lögreglu á helstu álagspunktum landsins hefur verið mikill í dag. Umferðin fór nokkuð rólega af stað í morgun og var lítið um að vera á helstu umferðaræðum. Sem fyrr heillaði Suðurlandið landsmenn en þúsundir sóttu Vestmannaeyjar heim um helgina.

Herjólfur hóf að ferja fólk úr eyjum seint í nótt hefur siglt á eins og hálftíma fresti síðan. Hátt í fimm þúsund manns hafa fengið far með Herjólfi í dag.

Að sögn lögreglunnar á Hvolsvelli, sem tekur á móti ferðalöngum í Landeyjahöfn, hefur daginn gengið afar vel. Fjölmargir hafa blásið í áfengismæla lögreglu. Af þeim hafa nokkrir mælst með áfengi í blóði.

Þjóðhátíðargestir hafa einnig farið flugleiðina en Flugfélag Íslands og Ernir hafa flutt tæplega sex hundruð manns frá Eyjum í dag. Það var því auðséð að umferðin myndu þyngjast nokkuð og sú var raunin seinni partinn á Selfossi í dag.

„Þetta er að aukast mikið, annars hefur þetta gengið afar," segir Kristófer Sæmundsson, varðstjóri hjá Umferðardeild. „Við vissum það að þetta yrði ansi mikið núna, veðrið spilar hér inn í."

Á fimmta tímanum í dag var umferðin inn í Reykjavík orðin ansi þétt. Umferðardeild stóð vaktina við Rauðavatn og stöðvaði bíla, til að tryggja að allt væri með felldu.

Kristófer og félagar í Umferðardeild stöðvuðu um fimmtíu bíla í dag, tveir bílstjórar voru teknir réttindalausir og engin ölvun undir stýri. Það má segja að umferðin hafa gengið nokkuð vel um helgina. Engu að síður varpar umferðarslys á Suðurlandsvegi í gær skugga á helgina, en þar létust tvær ungar stúlkur lífið.

„Almennt séð og fyrir utan þetta slys þá gekk helgin nokkuð vel. Fólk er glatt og sáttara hvert við annað.“

Umferðin um Blönduós hefur verið nokkuð þétt í dag. Varðstjóri segir þungan margfalt minni en undanfarin ár. Svipaða sögu er að segja af flestum lögregluumdæmum, svo virðist sem að ferðalangar hafi haldið rólega heim úr fríinu þetta árið.