Allir geislafræðingarnir drógu uppsagnir sínar til baka

Þeir geislafræðingar sem enn voru óákveðnir, 19 talsins, höfðu sett endurráðningu Katrínar Sigurðardóttur, formanns Félags geislafræðinga, sem sagt var upp í vor, sem skilyrði fyrir því að snúa aftur til starfa. Þeir drógu þó allir uppsagnir sínar til baka fyrir miðnætti í gær en sögðust í yfirlýsingu treysta því að Katrín yrði endurráðin.

Páll Matthíasson, staðgengill forstjóra Landspítalans, vonar að sátt ríki með niðurstöðuna í hópi geislafræðinga. „Ég veit það voru mjög skýrar óskir um bætur á vinnufyrirkomulagi og kjarabætur og Landspítalinn telur að það hafi verið farið eins langt og hægt var til að koma til móts við þær óskir,“ segir Páll.

Um helmingur geislafræðinganna hafði dregið uppsagnir sínar til baka um eftirmiðdaginn í gær, en sumir nýttu umhugsunartímann og tilkynningar frá þeim bárust fram eftir kvöldi. „Ég er mjög ánægður með að þessi öflugi hópur fagfólks hafi ákveðið að snúa aftur til vinnu og markmið okkar er auðvitað að vinna áfram með þessum hópi að því að bæta starfsaðstæður. Síðan eru auðvitað kjarasamningar lausir í vetur og þá eru þar möguleikar fyrir þennan hóp að sækja frekari bætur,“ segir Páll.

Til stóð að Katrín færi í atvinnuviðtal á spítalanum klukkan ellefu í morgun. Fyrir þann fund kvaðst Páll ekki geta lofað því að henni yrði boðin staða við spítalann, en sagði markmiðið að báðir aðilar kæmu ánægðir af fundinum. „Við þurfum bara að skoða það. Fundurinn er til þess að skoða annars vegar þarfir þjónustunnar fyrir starfskraft og hins vegar óskir og þekkingu Katrínar og reyna að ná samkomulagi,“ sagði Páll Matthíasson, staðgengill forstjóra Landspítalans.