Stjörnumenn með iPad á bekknum | Á gráu svæði

„Ég hreinlega treysti mér ekki til að svara því hvort þetta sé löglegt eða ekki. En þetta er á gráu svæði,“ segir Þórir Hákonarson, framkvæmdarstjóri KSÍ, vegna atviks sem átti sér stað á Stjörnuvellinum í gær.

Stjarnan vann í gær 3-1 sigur á FH í 16-liða úrslitum Borgunarbikarkeppni karla. Eins og sést á meðfylgjandi myndum fylgdust menn á varamannabekk Stjörnunnar með beinni útsendingu Stöðvar 2 Sports frá leiknum í gegnum OZ TV-appið á iPad-spjaldtölvu.

Það er óheimilt að vera með sjónvarpsskjái við varamannabekkinn sem sýna beina útsendingu frá leiknum og er það í gildi um allan heim.

„Ég get þó ekki séð að þetta sé beinlínis bannað enda hafa menn ekki endilega brugðist við nýrri tækni með nýrri reglugerð,“ sagði Þórir við Vísi í dag.

„Ég fékk fyrirspurn um þetta í gær og það er vert að íhuga hvernig þessu er nákvæmlega farið. Við þurfum að skoða í kringum okkur og líta til annarra landa.“

Það er þó skýrt í knattspyrnureglum að óheimilt er að endursýna umdeilanleg og vafasöm atvik á risaskjám á knattspyrnuleikvöngum.