Nexus víkur fyrir hóteli

Sérvöruverslunin Nexus yfirgefur Hverfisgötu í ágúst eftir 18 ára veru þar, og mun hótel rísa í stað verslunarinnar á gamla staðnum.

„Við erum búnir að prófa allar mögulega uppfærslur af búðinni í þessu húsnæði,“ segir Gísli Einarsson, eigandi verslunarinnar sem flytur nú í nýtt húsnæði í Nóatúni.

„Það hefur staðið til lengi að rífa þetta hús og reisa einhvers konar stórhýsi í staðinn. Við vissum þetta strax árið 2008, en svo kom kreppan og setti bremsuna á allar svona framkvæmdir. Við fengum því meiri tíma hér og ákváðum að nýta hann eins lengi og við gætum, en nú er semsagt komið að þetta hús verður rifið og það kemur hótel í staðinn.“

Gísli hefur ekki áhyggjur af því að kúnnahópurinn minnki við flutningana.

„Þegar ég valdi þennan stað upphaflega voru tvær ástæður fyrir því. Að vera stutt frá Hlemmi til þess að allir krakkar og unglingar í úthverfunum gætu hoppað í strætó og stokkið beint í Nexus. Síðan er þetta einn af mjög fáum stöðum í miðbænum sem er með nóg af bílastæðum. Á þessum átján árum hefur samt mikið breyst, og mjög margir viðskiptavinir okkar koma á bíl. Þeir sem eru að koma labbandi, þetta eru þá bara 700 metrum lengra frá Hlemmi fyrir þá.“

Mikil umræða hefur verið undanfarið um lokun ýmissa staða í miðbænum vegna fyrirhugaðs hótelreksturs, og eru ekki allir sáttir við þróun mála. Gísli er þó ekki á því að fjörið sé á leiðinni úr miðbænum þó Nexus flytji.

„Verður miðbærinn ekki bara að stækka? Ef það þarf að koma öllum ferðamönnunum fyrir og okkur Reykvíkingum líka, þá verður hann kannski bara að teygja sig austur í túnin og vestur í höfnina.“