Ungir framsóknarmenn skora á Illuga

Ungir framsóknarmenn skora á Illuga Gunnarsson menntamálaráðherra að skerða ekki aðgang fólks til náms með fyrirhuguðum breytingum á reglum Lánasjóðs íslenskra námsmanna.

LÍN ætlar að hækka kröfur um námsframvindu og hafa fjöldi námsmanna gagnrýnt ummæli Illuga þess efnis að þeir sem séu í námi af fullri alvöru ættu að geta risið undir auknum kröfum lánasjóðsins. Stúdentaráð Háskóla Íslands hefur meðal annars gagnrýnt breytinguna, og segja hana bitna helst á fjölskyldufólki og fólki með námsörðugleika.

Stjórn Sambands ungra framsóknarmanna hefur samþykkt áskorun til Illuga um að taka þessar breytingar til baka enda gangi þær „þvert á stefnuyfirlýsingu ríkisstjórnarinnar, svo sem að efla menntakerfið með hagsmuni nemenda að leiðarljósi og að berjast gegn brottfalli úr námi,“ eins og segir í tilkynningu frá sambandinu.

„Ljóst er að margir nemendur sem reiða sig á LÍN yrðu illa úti þar sem persónulegir hagir þeirra takmarka oft möguleikann á að stunda fullt nám. Mikilvægi menntunar fyrir okkar fámennu þjóð verður seint ofmetið. Þekking er og verður undirstaða framfara,“ segir í tilkynningunni.