Hraunavinir funduðu með ráðherra - málið í óleysanlegum hnút

Hraunvinir og fulltrúar M-listans í Garðabæ funduðu með Hönnu Birnu Kristjánsdóttur innanríkisráðherra í dag vegna fyrirhugaðra vegaframkvæmda í gegnum Gálgahraun í Garðabæ.

Reynir Ingibjartsson, formaður Hraunavina, segir augljóst af fundi með ráðherranum að hann muni ekki beita sér frekar í málinu. Hann segir ljóst að engar breytingar séu í sjónmáli.

„Niðurstaðan var eiginlega engin,“ segir Reynir um fundinn en Hraunavinir hafa, ásamt nokkrum öðrum náttúruverndarsamtökum, stefnt Vegamálastjóra fyrir Héraðsdóm Reykjavíkur vegna framkvæmdanna, en þeir vilja meina að útboðið sé ólöglegt.

Reynir segist vonast til þess að ekki verði gengið í framkvæmdir á meðan dómsmálið gengur í gegn, en málið var þingfest í síðustu viku og er vegamálastjóra gert að skila inn greinagerð í september.

Engin sátt hefur fundist í málinu, „og er það eiginlega bara enn í hnút,“ segir Reynir að lokum.