Fjölnir tattú trúlofaður

Fjölnir Geir Bragason, sem oftar en ekki er kenndur við tattú af þeim sökum að hann er landsþekktur húðflúrmeistari, trúlofaðist ástinn sinni á dögunum, fyrirsætunni Kristínu Lilju.   Við höfðum samband við Fjölni og spurðum hann hvernig hann bað um hönd unnustunnar.

Var búinn að gefa ástinni „þetta hefðbundna" 

„Ég er búinn að vera að spá í þetta í einhvern tíma en hef verið að reyna að finna réttan tíma og líka réttu hringana. Ég er ekkert of æstur yfir demöntum sökum blóðdemanta-skugganum sem á þeim hvílir. Ég var búinn að gefa henni þetta hefðbundna; gull með rúbín og gull með perlu," svarar Fjölnir og heldur áfram: 

„Og var að gæla við að fara á fund Eiríks Rauða sem er gullsmiður upp á eldgamla mátann. Hann vinnur aðallega með aðferðum víkinganna. Svo var það þegar ég hélt tattú og tónlistar hátíðina mína í Færeyjum núna í maí að ég sá hringa og brúðarsylgju einmitt í víkingastílnum sem ég var að leita að."

Gerir lýðnum ljóst að brúðurin er frátekin

„Einn listamannanna á hátíðinni, Kai Uve Faust, vinnur öll sín flúr handstungin upp á víkingamóðinn og konan hans hún María Stamm var einmitt að versla með víkingaskart sem var smíðað af Eiríki Rauða sem ég var á leið til fundar við. Þetta voru hringar og brúðarsylgja sem brúðurin gengur með á sér í ár eftir giftinguna til að gera lýðnum ljóst að hún sé frátekin. Þó var einn hængur á, brúðarsylgjan var seld og þá voru góð ráð dýr því annar færeyski flúrarinn á svæðinu, hún Maibrit, hafði keypt sylgjuna sem minjagrip um hátíðina," útskýrir Fjölnir og segir:  

En þegar hún frétti að af ráðahagnum vildi hún umsvifalaust gefa mér sylgjuna og sama var upp á teningnum með Kai og Mariu. Þannig að þarna voru fyrstu brúðargjafirnar komnar. - Hringarnir og sylgjan. Hversu fallegt er það?"  



Svo tók ég hana í fangið á mér  

„Svo þegar ég kom heim eftir þriggja vikna törn í Færeyjum þá byrjaði ég á að sýna Kristínu Lilju sylgjuna og útskýra fyrir henni hvað þetta væri. Svo tók ég hana í fangið á mér og leyfði henni að finna áþreifanlega fyrir ástinni og örygginu sem umlykur hana um leið og ég bar upp bónorðið."