Hann fer í þessa tæklingu eins og fljúgandi skítakamar

„Þetta voru mjög sanngjörn úrslit,“ sagði Hermann Hreiðarsson, þjálfari ÍBV, eftir leikinn í kvöld. ‚ÍBV gerði, 1-1, jafntefli við Val á Vodafone-vellinum  í lokaleik sjöundu umferð Pepsi-deildar karla í knattspyrnu.

„Við vorum hættulegri aðilinn í fyrri hálfleiknum og áttum betri færi. Liðið náði að nýta þetta eina færi gríðarlega vel.“

„Gott lið eins og Valur fær alltaf að eiga sína góðu kafla í hverjum leik og það gerðist í kvöld. Það var virkilega svekkjandi hvað við duttum aftarlega í síðari hálfleiknum og Valur uppsker mark eftir það.“

„1-0 er stórhættuleg staða og við ætluðum alls ekki að falla til baka, heldur halda okkur við sama leikskipulag en það gekk ekki upp og því var jafntefli sanngjörn úrslit.“

Hermann Hreiðarsson ærðist út í Hauk Pál, leikmann Vals, eftir eina tæklingu í síðari hálfleiknum og lét hann heldur betur heyra það. Þjálfarinn var stálheppinn að fá ekki gult spjald fyrir vikið en hann ætlaði fyrst að þruma boltanum upp í loftið, en til allra hamingju, fyrir hann, þá hitti Hermann ekki boltann.

„Hann kemur hérna eins og fljúgandi skítakamar, allt of seinn í tæklinguna og átti ekki möguleika í boltann. Ég er svosem ekki að biðja um nein spjöld þegar ég bregst svona við en mér fannst þetta bara nokkuð léleg tækling hjá honum. Hann þarf bara að læra svona hluti og ég get alveg tekið hann í smá kennslu í þessu.“

Hægt er að sjá myndbandið af viðtalinu við Hermann hér að ofan.