Femínistar gagnrýna WOW Air harðlega

Í grein sem birtist á knuz.is í dag gagnrýna femínistarnir Hildur Lillendahl og Steinunn Rögnvaldsdóttir texta sem má finna á heimasíðu WOW Air. Um er að ræða kynningartexta á Amsterdam, en undir millifyrirsögninni „Hass og hórur“ er fjallað um Rauða hverfið í borginni. „Textinn var gjörsamlega tekinn úr samhengi“, segir upplýsingafulltrúi WOW air.

Flugfélagið segir hverfið vera alræmt lastabæli sem sómakært fólk ýmist forðast eða þykist forðast. Þar sé elsta atvinnugrein í heimi stunduð og gleðikonur stilli sér upp í gluggum þar sem þær bíða eftir næsta kúnna. Því næst er sérstaklega minnst á að margar vændiskonurnar séu gamlar og lúnar en aðrar ef til vill ferskari.

Lýsa eftir jafnréttisstefnu WOW

Femínistar segja WOW leggjast lágt. „Flugfélagið tekur það beinlínis upp hjá sjálfu sér að markaðssetja líkama kvenna til að selja flug. Flugfélagið finnur líka hjá sér hvöt til að raða vændiskonunum í Amsterdam upp eftir girnileika þeirra.“ Knúzarar lýsa eftir jafnréttisstefnu WOW, að baki slíkrar markaðssetningar liggi djúpstæð kvenfyrirlitning.

Eins og að minnast ekki á Eiffel turninn í París

Svanhvít Friðriksdóttir, upplýsingafulltrúi WOW, skrifaði textann. Hún segir sorglegt að sjá Knúz konur taka orðin úr samhengi. „Ég vil biðjast velvirðingar á því að hafa sært eða móðgað einhvern. Þetta er umfjöllun um áfangastað sem ég skrifaði eftir upplýsingum sem ég fékk frá Ferðamannaráði Amsterdam, en Rauða hverfið er eitthvað sem dregur ferðamenn þangað og er órjúfanlegur hluti af menningu borgarinnar. Að minnast ekki á það er eins og að minnast ekki á Eiffel turninn í umfjöllun um París.“  

Búið að lagfæra textann

Svanhvít viðurkennir að orðalag textans hafa verið óheppilegt.  „Þetta var gjörsamlega tekið úr samhengi og fólk sem les umfjöllunina í heild sinni ætti að átta sig á því. Við tökum gagnrýninni þó að sjálfsögðu og textinn hefur verið lagfærður á vefsíðu okkar. Þetta er mjög leiðinlegt mál þar sem ég sjálf er mikill jafnréttissinni og meirihluti fólks í stjórnunarstöðum hjá WOW eru konur.“