Adolf Ingi á ströndinni með klappstýrum

Adolf Ingi Erlingsson verður með innslög frá Evrópumótinu í strandhandbolta á vef Evrópska handboltasambandsins í sumar. Dolli, eins og hann er oftast kallaður, hefur farið á kostum í óhefðbundinni umfjöllun sinni frá stórmótum í handbolta og er skemmst að minnast þess þegar hann bað norsku stórskyttuna Gro Hammerseng að sýna á sér magavöðvana eftir leik gegn Svíum á EM.

„Þetta verður í fyrsta skipti sem ég sé strandhandbolta,“ segir Dolli og skellir upp úr. „Þetta verður rosa stuð. Mótshaldarar gera þetta eins og með strandblakið - það verður diskótekari sem heldur uppi fjörinu, klappstýrur og læti. Ef veðrið verður gott verður þetta ábyggilega mikið fjör en ef það verður rigning verður fjörið ekki jafn mikið.“

Evrópumótið í strandhandbolta fer fram í Herring í Danmörku dagana 8. - 15. júlí. Átta lið í karla- og kvennaflokki eru skráð til leiks. Reglurnar eru svipaðar og í hefðbundnum handbolta, þó er ekki hægt að drippla boltanum auk þess sem boltinn er minni og mýkri.

Starfs síns vegna hefur Dolli þurft að kynna sér hinar ýmsu íþróttir en hann segir strandhandboltann ekki þá skrýtnustu. „Ég á eftir að kynna mér þetta almennilega - ég veit ekkert hvað ég er að fara út í ,“ segir Dolli. „Innanhússhjólreiðarnar eru hins vegar skrýtnasta íþróttin. Það eru mjög furðurlegar reglur í þeim.“

Dolli er að vonum spenntur fyrir mótinu. „Ætlunin er að við Guðni, sem fer með mér, verðum með einhver skemmtilegheit. Þetta er ekki alveg eins formlegt og hin mótin og ég held að það verði meira fjör þarna,“ segir Dolli. „Ég er mjög spenntur fyrir þessu. Ég vona bara að danska sumarið verði gott og maður geti  verið í stuttbuxum með sólgleraugu en ekki í pollagalla í blautum sandinum.“

Í meðfylgjandi myndbandi má sjá viðtal Dolla við Gro Hammerseng.