Kindurnar komast ekki út vegna kulda

„Við þurftum að taka kindurnar inn þegar það byrjaði að snjóa í lok október, svo þær eru búnar að vera mjög lengi inni,“ segir Guðmundur Halldórsson, bóndi að Ekru í Fljótsdalshéraði. Hann segir síðustu þrjú vor hafa einkennst af mikilli óvissu og að veðrið hafi hagað sér undarlega.

„Svona er þetta þegar maður er upp á náttúruna og veðrin kominn. Það leit út fyrir að það kæmi snjókoma á miðvikudaginn var en sem betur fer varð ekkert úr því. Það bjargaði heilmiklu fyrir okkur. Í fyrra byrjaði að snjóa um 20. maí, í miðjum sauðburði. Í ár er búið að vera mjög kalt en ekki jafn mikið um snjó,“ segir Guðmundur.

Veðráttan býður ekki upp á að setja kindurnar út eins og vaninn er. Guðmundur er því með mun fleiri kindur á húsi en síðustu ár. „Við erum að setja mun færri kindur út en vanalega, þá helst þær sem eru komnar með ágætlega stór lömb. Fjárhúsin eru mjög þétt setin víðast hvar og bændur hafa þurft að tæma hús og hlöður til að hafa nóg pláss. Ég er heppinn að vera með mjög gott fjárhús, annars væri ég í vandræðum.“

Guðmundur segir menn vera misvel undirbúna. „Bændur hafa verið að láta manninn á næsta bæ fá hey og annað. Þetta er misjafnt eftir bæjum.“ Það dugar þó ekkert annað til en að taka þetta á jákvæðininni. „Það eru hlýindi í kortunum og útlit fyrir að það hitni strax í næstu viku. Þá kemur vorið vonandi. Maður verður bara að vera bjartsýnn.“