Stökk fram af brú vegna taps liðsins síns

Eldheitur stuðningsmaður handboltaliðsins Buducnost stökk fram af brú í Podgorica í Svartfjallalandi eftir að liðið tapaði mikilvægum leik í Meistaradeild Evrópu.

RK Buducnost hefur verið eitt sterkasta kvennalið Evrópu í handbolta og er ríkjandi Evrópumeistari. Flestir leikmenn liðsins eru einnig í landsliði Svartfellinga sem er núverandi Evrópumeistari.

Liðið mun þó ekki verja titil sinn í Meistaradeildinni þetta árið. Buducnost tapaði fyrir ungverska liðinu Györ á sunnudag en með því varð ljóst að liðið kemst ekki áfram í undanúrslit keppninnar.

Almir Ajdarpasic er 21 árs gamall stuðningsmaður liðsins og var svo óánægður með tap liðsins að hann stökk framan af brú í Moraca-ána á heimleið frá leiknum. Honum varð þó ekki meint af og synti í land.