"Þetta snýst ekki um peninga, heldur mannorðið mitt“

Heimir Hannesson háskólanemi, segist vilja hreinsa mannorð sitt með því að stefna aðilum fyrir meiðyrði. Hann hyggst meðal annars stefna Vinstri grænum fyrir meiðyrði vegna umfjöllunar Smugunnar um aðsenda grein í Fréttablaðinu og fjallaði um breyttar verklagsreglur í Stúdentaráði. Þar kom orðið fjárdráttur fyrir.

Heimir birtir í dag pistil á Pressunni þar sem hann útskýrir í fyrsta skiptið sína hlið á þessu máli, sem kom upp í byrjun febrúar. Þá birti Stúdentaráð Háskóla Íslands tilkynningu á vef sínum þar sem kom fram að til stæði að breyta verklagsreglum eftir að framkvæmdastjóri og hagsmunafulltrúi Stúdentaráðs, starfsárið 2011-2012, þurftu að endurgreiða rúmlega hálfa milljón króna til ráðsins.

Málið snérist um að starfsmenn á skrifstofu Stúdentaráðs fengu til meðferðar úttektarkort frá N1 sem ætlað var til notkunar vegna starfa á vegum ráðsins. Vegna mistaka við útgáfu hafi starfsmönnum verið unnt að fara framyfir umsamda upphæð. Í upphaflega tilkynningu Stúdentaráðsins sagði svo orðrétt að framkvæmdastjóri og hagsmunafulltrúi ráðsins hefðu „vísvitandi í eigin þágu" farið fram yfir umsamda upphæð á útgáfukortum sem þeir höfðu undir höndum sem starfsmenn ráðsins.

Því greindi fréttasíða Rúv frá því að um fjárdrátt hefði verið að ræða. Sama gerði fréttamaður mbl.is. Það var þó leiðrétt í kjölfar þess að stúdentaráð sendi frá sér aðra yfirlýsinginu þar sem áréttað var að ekki hefði verið um fjárdrátt að ræða, en Jón Atli Hermannsson, varaformaður Stúdentaráðs Háskóla Íslands, sagði í samtali við Vísi fyrr í mánuðinum að orðalagið hefði verið óheppilegt í fyrri kynningunni.

Heimir var raunar aldrei nafngreindur í þessu máli. Það var ekki fyrr en hann hótaði að stefna Smugunni fyrir umfjöllun sína sem nafn hans kom fram, en Heimir var semsagt hagsmunafulltrúi Stúdentaráðs.

Heimir segist einnig saklaus af mistökum varðandi notkun kortsins og kallar það í raun „ klúður framkvæmdastjórans". Þannig skrifar Heimir:

„Engu að síður var það ákvörðun minna yfirmanna þegar reikningarnir bárust Stúdentaráði, og kom ég hvergi nærri þeirri ákvarðanatöku, að upphæðin á hverju korti skyldi dregin af launum okkar við hver mánaðamót – eins og gert er í mörgum fyrirtækjum með góðum árangri. Þetta samþykkti ég að sjálfsögðu – enda veglegir afslættir í boði á kortunum – grunlaus um það að þessi mistök gætu átt sér stað.

Vegna ítrekaðra mistaka framkvæmdastjórans sem jafnframt var launagreiðandi, var það svo ekki gert."

Í samtali við Vísi vildi Heimir ekki ræða efnislega um málið og vísaði á grein sína. Í greininni kemur fram að Stúdentaráð hafi beðið hann afsökunar á málinu. Heimir segist ekki ætla að höfða mál gegn ráðinu eins og hann hyggst gera gegn Vinstri grænum. Hann segir hinsvegar aðrar stefnur í farvatninu.

„Þetta snýst ekki um peninga heldur mannorðið mitt," segir Heimir að lokum.